Am leɛwayed-is, thegga-d Tddukkla Numidya n Wehran tafaska n yennayer, i d-yellan seg wass n 9 ar 12 janvier 2020. Iswi deffir leqdic n Tddukkla Numidya, d asfugel n useggas amaynut n yimaziɣen 2970, d ukemmel n teẓrigin n tfaska i d-tebda seg useggas n 2005, armi tessaweḍ ass-a ɣer teẓrigt tis 16. Niqal, ussan yezrin, ḥaren yiɛeggalen n tddukkla deg uheggi n usiher n useggas-agi, ladɣa tafaska yecban yennayer d leqdic meqqren.

Di lweqt ideg yuget umussu aɣerfan yeṭṭfen abrid s tikliwin, gar-asent tamdint n Wehran, d ayen i yeǧǧan leqdic adelsan ɣef teɣzi n useggas-a, ad yenqeṣ nezzeh deg waṭas n tamiwin. Maca, seld timliliyin i d-ijemɛen iɛeggalen n tddukkla ussan yezrin, ɣetsen ad kemmlen deg usfugel n yennayer, acku yesɛa azal, ɣas ma drus-iten ttawilat n uheggi i asen-yettunefken aseggas-agi.

Yella-d wahil d anesbaɣur

Yebda wahil ass-nni n aram 7 yennayer 2020 ɣef 11h, s temlilit d tɣamsa deg Uxxam n tddukkla, syin azekka-nni n, 8 deg waggur i deg-i nella, ɣef 14h, d asenṣef s yinebgawen i d-yerzan seg waṭas n twilayin d ureṣṣi n temsikent deg tzeqqa n Midyatik. Ass n amhad ɣef 11h 30, yella-d usunẓu unṣib s terbaɛt n yiḍebbalen d uneḥḍur n wudmawen n yidles, ma ɣef 14h, nwala-d asarag deg tnedlist n Katidral, ɣef yisefra n Ccix Yeḥya Awasif akked kra seg umezruy d tgemmi n yennayer, d wamek qqimen yimaziɣen ar ass-a n wussan sseḥbibiren fell-as.

Ma tameddit n wass, ɣef 17h, deg Uxxam n umezgun n Wehran Ɛebdelqader Ɛellula, tella-d tmezgunt “Muḥ Terri”, i d-yessenked M.Letrec i d-yerzan seg TRB n Bgayet. Ass wis sin, 10 deg waggur-a ɣef 10h, d tuffɣa n yinebgawen ɣer Santa Kruz. Ma d tameddit, dima deg Midyatik, d taẓuri i warrac, s usezri n tmucuha d yisura n teqbaylit. Deg wass n 11, llan-d yisaragen ɣef tmeslayt n At Ɛebbas di tmura lɣerba sɣur uselmad asdawan di Wehran Dr Karim Waras. Deg yiḍ, deg usensu n Belgayed, d imensi n yennayer di lxaṭer n yimttekkiyen d yinebgawen akked tmeɣra n useggas amaynut 2970 ɣef 23h.

Deg wass ukuẓ, lḥedd, d tuffɣa deg yizenqan n temdint, d usekfel n kra n yidgan inmazrayen s lmendad n umnir imerri n tddukkla Bel Horizon, syin d asnaz n yidlisen s ubuddu sɣur yimyura, ar deqqal tella-d tmeddit n tmedyazt di TRO.Syin, ɣef 17h d ccna sɣur kra n trebbuyaɛ tiqbayliyin, d ccna n tlawin n At Snus, syin tuɣal tejmilt i umeɣnas Ǧamal Benɛuf d usali n yirmad s tukci n warrazen i yimttekkiyen.

I usmekti, ɣef teɣzi n wussan n tfaska, llan-d yisikwan (ateliers) n uselmed, aɣmis d usmel n tddukkla deg internet, timucuha, igelmusen n Ayrad n At Snus deg tzeqqa n Midyatik. Akken daɣen, i d-yettili yal iḍ usiwel n tmedyazt, n ccnawi d uẓawan deg usensu n Belgayed.

D tajmilt i Ǧamal Benɛuf

Deg kraḍ n yiseggasen-aya yezrin, yal mi ara d-yeḥḍer yennayer deg Wehran, tettfaraṣ-it Tddukkla Numidya s tririt n tejmilt i kra n wudem i d-yefkan i yidles amaziɣ. Seld mi rran tajmilt i baba-s n Nna Mekyusa, tameṭṭut i d-ittheggin seksu n yennayer segmi bdant tfaskiwin, ilindi d amyaru, argaz n tsekla Abdellah Haman iwumi tuɣal tejmilt, aseggas-a d nnuba n umyaru d umeɣnas Ǧamal Benɛuf, i d-imudden war cceḥḥa i teqbaylit s wayen yura d wayen yeqdec, deg uḥric n tsekla, amezgun d uselmed n tmaziɣt s tmaɣzelt (volontariat) i wazal n 15 iseggasen, ladɣa imi yuḍen sin-a n yiseggasen yezrin.

D asteɛref diɣen akken ur ifeccel ara u ad iẓer belli ayen iga i tmaziɣt ur iruḥ ara deg ulac. Yumer nezzeh s tejmilt-a, nesteqsa-t ɣer taggara, dɣa yenna-d “ Tanemmirt i yimeddukkal-nneɣ deg tddukkla Numidya ɣef usmekti-a, umreɣ ayendin s tejmilt-a, ssarameɣ ad iliɣ uklaleɣ xerṣum ula d cwiṭ seg waṭas n wazalen i yi-ttgen, akken daɣen i ttmenniɣ ad tili ugar tdukli gar leqbayel i izedɣen berra i tmurt n leqbayel”.

Khaled Achoui